សូម៉ាលី៖ ការបំផ្ទុះគ្រាប់បែកទៅលើឡានដឹកកីឡាករបាល់ទាត់មួយយ៉ាងគួរឱ្យរន្ធត់ បានកើតឡើងនៅតំបន់កំពង់ផែ Kismayo ដែលបានសម្លាប់កីឡាករបាល់ទាត់ដែលនៅលើរថយន្តក្រុងនេះយ៉ាងហោចណាស់ ៥នាក់។ នេះបើតាមសេចក្តីរាយការណ៍របស់នគរបាលក្នុងតំបន់។

នាយប្រតិបត្តិការ លោក Ahmed Farah បានបញ្ជាក់ប្រាប់សារព័ត៌មានថា មកទល់ពេលនេះមានកីឡាករ ៥នាក់ត្រូវបានរាយការណ៍ថាបានបាត់បង់ជីវិត និងចំនួន ១២នាក់ផ្សេងទៀតរងរបួស និងមានមួយចំនួនទៀតបានបាត់ខ្លួន ដោយសារតែរថយន្តដឹកអ្នកដំណើរសម្រាប់ដឹកជញ្ជូនកីឡាករនោះ បានផ្ទុះឆេះនិងខូចខាតទាំងស្រុងតែម្តង។

មិនមានក្រុមសកម្មប្រយុទ្ធណាមួយចេញមុខមកទទួលខុសត្រូវសម្រាប់ហេតុការណ៍បំផ្ទុះគ្រាប់បែកនេះឡើយ។

យ៉ាងណាមិញ ប្រធានាធិបតីប្រទេសសូម៉ាលី លោក Mohamed Abdullahi បានបង្ហោះសារនៅលើបណ្តាញសង្គម Twiiter ផ្លូវការរបស់លោក ដោយបានចូលរួមរំលែកមរណទុក្ខយ៉ាងក្រៀមក្រំសម្រាប់មរណភាពរបស់ជនរងគ្រោះ។ មិនត្រឹមតែប៉ុណ្ណោះ ប្រធានាធិបតីក៏បានដាក់បន្ទុកការទទួលខុសត្រូវទៅលើក្រុមសកម្មប្រយុទ្ធ Al Shabab ដែលជាប់ពាក់ព័ន្ធទៅនឹងក្រុមសកម្មប្រយុទ្ធអាល់កៃដា ថាជាអ្នកនៅពីក្រោយផែនការបំផ្ទុះគ្រាប់បែកយ៉ាងរន្ធត់នេះ៕